طريقة استيراد الملابس من تركيا

🔴✅ للناس اللي حابة تخدم

🔘السلام عليكم .

اليوم حبيت نحكي على موضوع ناس ياسر سقساو عليه اللي هو طريقة استيراد الملابس من تركيا كاين ياسر لي يكذبوا عليهم و يقولولهم لازمك معريفة ف la douane ولازمك ترشي ولازم يكون عندك روجيستر و ...(ماكاش منها)

المهم لي يحب يتبع الطريقة 👇

*🚩 ماننصحش هاذوك لي يحبو يشريو عن طريق الانترنت شحال من واحد سرقوه و شحال من واحد كي لحقاتو السلعة ماعجباتوش ومايلقاهاش كيما ف les photos ( لازمك تروح وتشوف سلعتك قدامك ) 🛑

-🚩اول حاجة لازمك تفتح compte devise في البنك باش كي تعود رايح ديكلاري شحال راك مدي أورو وإذا كنت رايح تدي اقل من 5000€ ماشي شرط ديكلاري ؛ وأكبر مبلغ تقدر تفوتو معاك هو 7500€ اي حوالي 150 مليون.

يعني كي تهز فوق 5000 اورو لازم تجيب ورقة تع البنك

بلي راك دخلت المبلغ وخرجتو في 24 ساعة فقط

ثاني حاجة لازم تكون عندك visa و يمدوها ل 90% تسقاملك حوالي 15000دج (تاع خرجة وحدة في 6 اشهر) و تذكرة السفر حوالي 5 ملاين تقدر تكون أكثر ولا أقل، و تريزارفي في فندق على حساب مقدورك اذا رايح تخدم شوف فندق رخيس شوية حوالي 2000دج لليلة من الأحسن يكون في منطقة" beyazit" (كمل اقرأ تفهم علاش).

إذن اذا رايح تقعد 5 أيام مثلا تسقاملك : 4 او 5 ملايين تذكرة سفر + 1,5فيزا + 1 مليون فندق + 1 مليون أكل وشرب و مواصلات اي حوالي 8 ملاين او اكثر شويا (5 أيام لي رايح يخدم ماشي يحوس) .

إذن كي تروح وتوصل للفندق ورايح تبدأ تخدم اول حاجة ديرها تروح عند transitaire لي رايح تبعث معاه سلعتك باش تفتح كود خاص بيك بحيث تكون سقسيت على transitaire قبل ماتروح لتركيا ( كل منطقة عندهم transitaire لي يجيبو معاهم السلعة: العاصمة وهران عنابة ...) les transitaire لي نجيبو معاهم سلعتنا معظمهم في "beyazit" وكذلك الفنادق لي يباتو فيهم التجار .إذن الفندق و transitaire يكونو قراب لبعضاهم ، وباش تفتح كود عندو تعطيه فقط اسمك ولقبك و رقم هاتفك تاع الجزاير و المنطقة لي تسكن فيها ما تخلص والو 0 دينار . يسلجلك عندو و يعطيك des cartes visite مكتوب فيهم رقم الكود تاعك . ( كي تكون عندو تلقى ورقة مكتوب فيها ماركات مايفوتهاش هو ولا يفوتها غالية صورها باش من المستحسن ماتشريش هاذيك الماركات تلقاها رجالية خاصة )

من بعد تروح تبدأ تشري سلعتك من المنطقة لي حابها انت او سقسيت عليها " beyazit" او " merter " او laleli

كي تشري سلعة ادا شريت كمية كبيرة شوية راك تخلي la carte visite تاع transitaire لي فيها رقم الكود الخاص بيك عند صاحب المحل لي شريت من عندو و هو يوصلك سلعتك عند transitaire ، وإذا شريت بكمية قليلة من عدة محلات حاول انك تجمع السلعة تاعك عندك كاش واحد فيهم و تتفاهم معاه يوصلهالك عند transitaire .( اي واحد تشري عليه سلعة حاول تقولو يوصلهالك ل transitaire في نفس اليوم)

وكي تشري السلعة اكيد يعطيك un bon فيه شحال عندك سلعة والأسعار و ... تاع سلعتك و فيه رقم الهاتف تاعو

استحفظ بهاداك le bon و كي تكمل قضيانك لعشية روح عند transitaire شوف إذا لحقاتك سلعتك vérifié مليح واحسبها مليح واذا مالحقتكش عيطلو insisté باش يجيبهالك واذا ماجابهاش غدوة تلقاها لحقاتك.

المهم نفس الطريقة تتعامل بيها مع كامل التجار لي تشري عليهم و تقدر تشري كمية قليلة ترفدها في يدك و تديها ل transitaire . حاول انك تكمل تسلع قبل ما تكون مروح بنهار باش اذا مالحقاتكش كاش سلعة تقدر تروح عند لي شريت عليه جيبها .

⬅وفي الاخير كي تلحق كامل سلعتك عند transitaire يكون هو حاطها في مكان مخصص لك تروح باش يديرهالك في "كارطون" او "شوالة" توقف معاه تعمرها مليح وتقفلها معاه و يمركيلك فيها رقم الكود تاعك (حذار يغلطلك فالكود) تخلصو لثم 30 الى40 ليرة للكارطونة الواحدة وانت على حساب واش عندك (هذا لي يشارجيلك الكارطونة ويقفلها)

وتتفاهم معاهم اذا حاب تدفع سلعتك فطيارة ولا بابور اي شحن جوي أو بحري (طيارة تلحقك سلعتك في 3 او 4 أيام و بابور تلحق في أسبوع الى 15 يوم هكداك و من الأحسن تدفعها بابور لأن السعر رخيس شوية مقارنة مع الطيارة )

مبعد كي تروح للجزائر كي تلحق سلعتك يعيطولك في رقم التيليفون لي خليتلهم في تركيا يقولولوك اذا تحب جي تدي سلعتك ولا نجيبوهالك وين تسكن ولا للمحل تاعك.

كي يجيبولك سلعتك لثم تخلصهم حق التوصيل او "الشحن"، الكارطونة كل transitaire كيفاش يحسبها كاين 13000دج ، 15000دج ، 18000دج ..

زيد تنجم تجيب معاك القش في كابا تاعك حوالي 40كغ

مدابيك ماتبينش بلي جايب سلعة جيب كل حاجة منها قطعة او قطعتين كي شغل جايب هدايا للعائلة